KAPÍTULO # 11
DILIGENTE DEN SIRBISHI

 

   
   
 
Página 86
 
 

Energia i bon boluntat

   Éksito no ta dependé tantu di e talento manera di e energia i di e bon boluntat. No ta talentonan magnífiko ku nos tin ta pone nos duna un sirbishi aseptabel, sino e kumplimentu estrikto di e debernan di kada dia, e spiritu kontentu, interes sinsero i sin fingi pa e bienestar di otronan. Den e kosnan mas humilde por haña bèrdadero ekselensia. E trabounan mas komun, ora nan ta hasí ku fidelidat yen di amor, ta bunita na bista di Dios (Profetas y Reyes, página 164. Aña 1917).

No tin lugá pa flohera

   No laga ningun hende pensa ku e ta liber pa krusa brasa i no hasi nada. Ta kompletamente imposibel pa un hende por salba den flohera i inaktividat. Pensa loke Hesus a hasi durante Su ministerio aki na tera. ¡Ku kuantu deboshon, kon inkansabel tabata Su esfuersonan! E no tabata pèrmití pa nada strob’É di e obra ku a wòrdu konfiá na dj’E. Nos ta siguiendo Su pasonan? E la bandoná tur kos pa sigui e (108) plan miserikordioso di Dios na fabor di e humanidat kaí. Den e kumplimentu di e propósito selestial, E la bira obediente ta na morto, i morto di krus. E no tabatin ningun komunion ku piká; E no a konosé piká di ningun manera, pero E la bin na e mundu aki, i a

 
   
 
Página 87
 
 

tuma riba Su alma sin mancha e kulpa di hende pekadó pa asina e pekadónan por ta hustifiká dilanti di Dios. E la lucha ku tentashon i a vense na nos fabor. E Yu di Dios, puru i sin kontaminashon, a karga e kastigu di desobedensia, i a risibí e gòlpi di morto ku a trese liberashon na humanidat (Review and Herald, 20-1-1903).

Trabou enérgiko

   E sirbidónan di Dios mester ta “no floho den trabou; aktivo den spiritu, sirbiendo Señor”. Deskuido i falta di efikasia no ta deboshon. Ora ku nos sinti ku nos ta traha pa Dios, nos lo tin un komprenshon mas haltu ku nunka ántes nos tabatin dje karakter sagrado di e sirbishi spiritual. E komprenshon aki lo pone bida, vigilansia i energia perseverante den kumplimentu di tur deber. E religion, e religion puru i sin mancha ta intensamente práktiko. Ningun otro kos sino e trabou ferviente i aktivo lo tin balor den salbashon di alma. Nos mester hasi di nos debernan di kada dia aktonan di deboshon, (109) ku ta oumentá konstantemente den utilidat pasobra nos ta mira nos obra den e lus di eternidat (Carta 43, 1902).

Regularidat i rapides

   Dios no por usa hende floho den Su kousa; E mester di obreronan ku ta pensa, bondadoso, amabel i ferviente…. E personanan ku no a atkirí kustumbernan di diligensia skèrpi i probechamentu di tempu, mester a pone reglanan ku ta promové den nan,

 
   
 
Página 88
 
 

regularidat i rapides (Testimonies, tomo 4, página 411. Aña 1880).

Lanta tempran; traha ku diligensia

   E obra dje kolportor ta un obra elevá i lo e ta un éksito si e ta un hende honrado, ferviente, ku pasenshi, i ku ta hasi e trabou ku e la kuminsá ku perseveransia. Su kurason mester ta den su trabou. E mester lanta tempran i traha ku diligensia, dunando asina e debido uso na e fakultatnan ku Dios a dun’é. E mester enfrentá e difikultatnan. Si nan wòrdu enfrentá ku pèrseveransia sin stòp, nan lo ta vensí. Konstantemente e obrero mester ta formando un karakter simétriko. Gran karakternan ta wòrdu formá di akto, i esfuersonan chikitu (Manual for Canvassers, página 18. Aña 1902). (110)

Fiel na e deber

   Esnan ku a drenta den e kampo di kolportahe ta den peliger di no sinti e nesesidat di ta kuidadoso den nan obra. Nan ta den peliger di kontentá nan mes ku trabounan superfisial, di ta deskuidá den nan modalnan i floho den nan aktividat mental. Mester tin un kumplimentu fiel di e deber den e kampo di kolportahe, pasobra esaki ta importante i sagrado (Review and Herald, 20-5-1890).

Eksakto i diligente

   Kòrda ku den kualke puesto di sirbishi, boso ta revelá kiko ta inspirá boso i ta desaroyá boso karakter. Tur loke boso ta hasi, hasié ku eksaktitut i diligensia; dominá e tendensia di buska trabounan fásil

 
   
 
Página 89
 
 

(El Ministerio de Curación, página 399. Aña 1905).
   Ora nos ta traha ku diligensia pa salbashon di nos semehantenan, Dios lo duna éksito na tur nos esfuersonan (Joyas de los Testimonios, tomo 3, página 324. Aña 1909).
   Una bes ku e kolportor kuminsá su trabou, e no mester pèrmití pa e wòrdu distraí di dje, sino ku e mester perseverá inteligentemente i ku tur diligensia konsentrá, den un punto. Sin embargo, miéntras e ta kolportá e no mester deskuidá e oportunidatnan di yuda e almanan ku tin mester di lus i di konsuelo for di e Skrituranan. Si e kolportor ta (111) kana ku Dios, si den su orashon e ta pidi sabiduria selestial pa hasi loke ta bon i solamente loke ta bon den su trabou, lo e deskubrí rápidamente su oportunidatnan i e nesesidatnan di e almanan ku kua e ta trata. Lo e probechá tur oportunidat di hiba nan na Kristu. Den e Spiritu di Kristu, lo e ta kla pa papia un palabra na esun kansá (Id., tomo 2, página 554. Aña 1900).

Konta susesonan ku ta animá

   Esnan ku haña tal eksperensia den nan trabou pa Señor, mester skirbi un relato di dje pa nos revistanan, pa asina e por ta di ánimo pa otronan. Laga e kolportor papia dje goso i bendishon ku e la disfrutá den su ministerio komo evangelista. E sorto di informenan aki, mester haña un lugá den nos revistanan; pasobra nan influensia ta di gran importansia. Nan lo ta komo un fragansia dushi den iglesia i un sabor di bida pa bida. Asina anto ta wòrdu mirá ku Dios ta obra ku esnan ku ta koperá ku n’É (Id., página 551. Aña 1900).

(112)